في أوروبا و الدول المتقدمة: إتبرع للرئيس!

في أوروبا و الدول المتقدمة : إتبرع للرئيس القادم !

لوحظ  في الفترة الأخيرة طلبات من عدد لا بأس به من المرشحين للرئاسة بدعم المواطنيين لهم مادياً نظراً لعدم قدرتهم على دفع تكاليف حملات الرئاسة الباهظة جدا جدا.. و أهو بيني و بينك برضه أطلع للشعب معييش بدل ما حد يقول لي جب الفلوس دي منين من أولها ! و الموضوع مش عيب.. مش عيب إن مواطن يدفع لو قادر في إنه يساعد مرشح  مادياً أو يساعده بمجهوده -عمل بدون أجر- بل بالعكس الكلام ده مطلوب، خصوصاً لو في مرشحين معندهمش القدرة على دفع مبالغ ضخمة مثل خالد علي و بكدة نقدر ندخل في طبقات تانية أو نوسع دائرة إختيارنا للرؤساء، بمعنى إن مش شرط أسسي إن يكون الرئيس شخص غني مادياً، فموضوع الأرزاق ليس علينا كبشر، المطلوب أو المفروض إننا نركز في من يصلح حقاً في إدارة البلد.

المشكلة تكمن في طريقة طلب الدعم ! أو التحرك فعلاً في أخذ الدعم من المواطنين، بطرق سهلة و مفهاش إهانة للمرشح بمعنى إنه مش هينزل يلف و يقول تبرع للرئيس القادم! .. الموضوع أبسط من كده، في أوروبا و الدول المتقدمة فيه برضه مرئحين بيطلبوا دعم مادي، لكن في الواقع بيكون بطرق تانية أكثر تحضراً و بتكون فعالة أكثر من غيرها. و المثال إلي هخدوا هيكون لميت رومني و هو مرشح لرئاسة الولايات المتحدة الأمريكية و هو من أكبر منافسين باراك أوباما. ميت رومني رجل أعمال في الأساس و هو أيضاً سياسي.. و رغم إنه رجل أعمال لكنه أيضاً بيتقبل دعم مادي من المواطنين الذين يدعمون فكره و مؤمنين به كرئيس جمهورية..

لو دخلت على موقع مت رومني هتلاقيه بيتلقى الدعم بطريقتين

الطريقة الأولى (التبرعات) :

لو دخلت على موقع مت رومني الإنتخابي هتلاقي إنه  عامل زرار باللون الأحمر مكتوب عليه “تبرع” و لما بتضغط هتلاقي إن في صفحة بتظهر من خلالها بيتبرع أي شخص ليه عن طريق البطاقات الإئتمانية، و لو هنتكلم بصراحة النوع ده مش ماشي في مصر بصراحة.

الطريقة الثانية (المنتجات) :

و هذه الطريقة أرى إنها مهمة جداً و حقاً هتفرق مع إلي هينفذها (ده إن نفذها أصلاً) و هي بيع منتجات عليها إسم أو شعار حملة المرشح بسعرأعلى من قيمتها و بكدة بيكون ضرب عصفورين بحجر.. أول شئ هو لم ثمن المنتجات و جمع أموال تقدر تساعده في الجولات الإنتخابية، ثانياً هو عمل دعاية مجانية لنفسه لأن مثلاً أنا لو هشتري تي شيرت عليه إسم الرئيس إلي أنا بدعمه و التي شيرت معمول بتصميم جميل فأول شئ أنا أصبحت بدعمه في كل مكان بروحه، ثاني شئ بخلق فرصة لفتح مجال للحوار مع أشخاص آخرين هيشفوني لابس التي شيرت فيحبوا يعرفوا من هذا المرشح.

طبعاً مش شرط يكون تي شيرت، ممكن تي شيرتات، قبعات، بدجات، إستيكرات على السيارات بطريقة لا تؤذي العين، ماجات.. و غيرها من المنتجات

صورة من موقع ميت رومني – بعش المنتجات العروضة لدعمه في إنتخابات الرئاسة

و كما ذكرت مسبقاً الأفكار دي هتخلي أشخاص جايز يجون أفكارهم أحسن من إلي موجودين في الساحة الآن يظهروا، لأن مبدأ إن يكون الشخص قادر على حملة دعائية ليس من شروط المترشح للرئاسة (على حد علمي).. لو شايف إن الموضوع يستحق النظر فيه إنشره لغيرك، لعل و عسى حد يسمع .